आजदेखि हामी साप्ताहिक पत्रिका प्रकाशन यात्राको स्थापनाको छैटौं बसन्त पूरा गरी सातौं वर्षमा प्रवेश गरेका छौँ । सिकाइ कहिल्यै अन्त्य हूँदैन भने जस्तै विगतका वर्षहरु हाम्रा लागि सिकाइ कै वर्ष रहे । कर्तव्यपथमा देखा परेका कठिनाईहरू पन्छाउने क्रममा हामीले धेरै अनुभवहरू पनि संगालेका छौँ । अनुभव आफैँमा शिक्षा पनि हो भन्ने कुरा हामीले राम्ररी बुझ्ने अबसर पायौं । हाम्रा विगतका अनुभवहरु आगामी यात्राको पथप्रदर्शक हुने विश्वास लिएका छौँ । हाम्रो प्रकाशनको लक्ष्य भनेकै निर्भिक स्वतन्त्र पत्रकारीता द्वारा लोकतान्त्रिक स्थायित्व, शान्तिको स्थापना र त्यसबाट समृद्धिको बाटो सहज बनाउनु हो ।
सूचना प्रविधिको तिव्र विकासका कारण आमसञ्चार माध्यमको परिधि पनि दिन प्रतिदिन फैलदै गएको छ । सुनौलो खबर पत्रिका साप्ताहिक रुपमा प्रकाशन भए पछिका वर्षहरुमा देशमा ठूला परिवर्तनहरु भएका छन् । लोकतान्त्रिक पद्धतीको विकास, विधिको शासन, प्रेस स्वतन्त्रता, नागरिक अधिकार जस्ता महत्वपूर्ण विषयमा रहेर हामिले आफ्नो भूमिका निर्वाह गर्ने नै छौं । हामिले प्रकाशन आरम्भको चरण देखि नै धेरै कुरा सिक्ने अवसर पाएका छौं । सत्य तथ्य सूचना प्रकाशनका क्रममा देखा परेका चुनौतीहरुको सामना गर्दै आएका छौं । आगामी दिनहरुमा पनि जनताको सूचना पाउने अधिकारमा हामी अंकुस लाग्न दिने छैनौं । स्वतन्त्र र निश्पक्ष पत्रकारीता व्यवसायिक पत्रकारिताको धर्म भएकाले हामी हाम्रो धरातललाई कदापी भुल्ने छैनौं । सत्य, तथ्य र निष्पक्ष जस्ता पत्रकारिताका आधारभूत मान्यताबाट हामी कहिल्यै डगमगाएका छैनौँ र डगमगाउँदैनौ पनि ! हामीले यो पनि सङ्कल्प गरेका छौं की सूनौलो खबर पत्रिकामा कूनै राजनीतिक वा गैर–राजनीतिक शक्तिको छायाँ कहिल्यै पर्ने छैन ।
अन्त्यमा हामी सातौं वर्ष प्रवेशको यस घडीमा यहाँ सम्मको यात्रामा हामीलाई प्रत्यक्ष, परोक्ष सहयोग गर्नु हूने सम्पूर्ण संघ–संस्था, विज्ञापन दाता, पाठक, लेखक तथा शुभेक्षुक, शुभ–चिन्तकहरूमा हार्दिक आभार व्यक्त गर्दछौँ । छ वर्षको यो यात्रामा आएका उकाली, ओरोलीमा सहयात्री बन्नु हुने सुनौलो खबर परिवारका सम्पूर्ण सदस्यहरुलाई पनि धन्यवाद ज्ञापन गर्दछौँ । आगामी दिनमा पनि यहाँहरूबाट यस्तै साथ, सहयोग र मायाँको अपेक्षा गर्दछौँ । विगतको बर्षहरुमा जस्तै आगामी दिनमा पनि हामी समाजमा हुने गरेका घटनाहरुको यथार्थ चित्रण गरेर तपाई सम्पूर्ण जनमानसलाई सुसुचित गर्न निरन्तर लागि परि रहने छौँ । समाजमा जरो गाडेर रहेको विकृती विशंगतीको अन्त्यको लागि हामी सँधै आवाज बूलन्द गरिरहने छौँ ।