गोरखा, पालुङटार । आगामी चाडपर्वको समयमा बजारमा हुनसक्ने कालोबजारी, कृत्रिम अभाव, म्याद गुज्रिएका तथा गुणस्तरहीन वस्तुको बिक्री-वितरण र उपभोक्ता ठगीजस्ता अवाञ्छित गतिविधि नियन्त्रण गर्ने उद्देश्यले ठाँटीपोखरी बजारमा संयुक्त बजार अनुगमन गरिएको छ। 
गण्डकी प्रदेश सरकार, उद्योग तथा पर्यटन मन्त्रालय एवं सामाजिक विकास युवा तथा खेलकुद मन्त्रालयअन्तर्गतको एकीकृत सेवा कार्यालय, गोरखाका निमित्त प्रमुख दशरथ शर्माको नेतृत्वमा एकीकृत सेवा कार्यालय र पालुङटार नगरपालिकाको संयुक्त टोलीले उक्त अनुगमन गरेको हो।
अनुगमनका क्रममा बजारमा बिक्री-वितरण भइरहेका दैनिक उपभोग्य सामग्रीको गुणस्तर, मूल्यसूची, साइनबोर्ड, व्यवसाय दर्ता तथा नवीकरण, नापतौलको प्रमाण, PAN/VAT दर्ता, बिक्री बिल र खरिद बिलको अवस्था निरीक्षण गरिएको छ। त्यसैगरी मासु तथा मिठाईको गुणस्तर, खाद्य अनुज्ञा पत्र, र ग्याँसको तौल तथा मूल्यलगायत १५ विभिन्न मापदण्ड र सूचकहरूमा केन्द्रित भई अनुगमन गरिएको जानकारी दिइएको छ।
अनुगमनका क्रममा स्वीकृत फारममा उल्लेख गरिएअनुसार, “एक पटक दिइएका निर्देशनहरू पुनः अनुगमन गर्दा पालना नभएको पाइएमा प्रचलित कानुन बमोजिम कडा कारबाही गरिनेछ।” व्यवसायीहरूलाई प्रचलित कानुन तथा मापदण्डको पूर्ण पालना गर्न, वास्तविक मूल्यअनुसार कारोबार गर्न, म्याद नाघेका सामग्री बिक्री नगर्न र उपभोक्ताको स्वास्थ्य एवं अधिकारप्रति जिम्मेवार बन्न निर्देशन दिइएको छ।
बजारलाई स्वच्छ, व्यवस्थित र उपभोक्तामैत्री बनाउँदै आम नागरिकलाई उचित मूल्यमा गुणस्तरीय वस्तु तथा सेवा प्राप्त गर्ने वातावरण मिलाउनु अनुगमनको मुख्य उद्देश्य रहेको एकीकृत सेवा कार्यालय र पालुङटार नगरपालिकाले जनाएका छन्।
साथै, पालुङटार नगरपालिकाले आम उपभोक्तालाई सामान खरिद गर्दा अनिवार्य रूपमा मूल्यसूची हेर्न, उत्पादन तथा उपभोग्य मिति जाँच गर्न र बिक्री बिल लिन आग्रह गरेको छ। बजारमा कुनै पनि प्रकारको कालोबजारी, अनुचित मूल्य असुली वा गुणस्तरहीन वस्तु बिक्री भएको पाइएमा तुरुन्त सम्बन्धित निकायमा जानकारी गराउनसमेत आह्वान गरिएको छ।
