लमजुङ । राइनास नगरपालिका–१ का गोविन्दराज न्यौपानेले आफ्ना स्वर्गीय पिता बोधनाथ न्यौपानेको ४०औँ स्मृति दिवसको अवसरमा राइनास–८ तार्कुघाटस्थित श्री वीरभक्ति माध्यमिक विद्यालयलाई ४० थान पुस्तक हस्तान्तरण गरेका छन्।
२०४२ साल मंसिर २२ गते निधन भएका दिवंगत न्यौपानेको स्मरणमा आयोजित कार्यक्रममा पुस्तक हस्तान्तरणसँगै उत्कृष्ट विद्यार्थीलाई नगद सम्मानसमेत प्रदान गरिएको विद्यालयका प्रधानाध्यापक नुर मोहमद मियाले जानकारी दिए।
सो अवसरमा कक्षा ९ का विद्यार्थी रियान अलि मिया र कक्षा १० की विद्यार्थी प्रतीक्षा राना मगरलाई जनही रु १,१०० का दरले नगद सहयोग गरिएको थियो।
पुस्तक सहयोगको अभियान सफल बनाउन प्रेम घले (कोलोसोथर), महाप्रसाद अधिकारी (राइनास), विष्णुप्रसाद कट्टेल (राइनास), बिष्णु प्रसाद घिमिरे (सिरानचोक), अजित आचार्य (व्यास) र मोहिनी शर्मा (भानु) लगायतले सहयोग गरेका थिए। विशेष सहयोगीका रूपमा समिर बस्नेत (काभ्रेपलाञ्चोक) र भीम सापकोटा (भोटेवडार) को उल्लेखनीय योगदान रहेको बताइयो ।
गोविन्दराज न्यौपाने विगतदेखि नै शिक्षाक्षेत्रमा सहयोगी व्यक्तित्वका रूपमा परिचित छन् । यसअघि बुवाको २९औँ स्मृति दिवसमा उनले राइनास–४ स्थित श्री सौभाग्यदय माध्यमिक विद्यालयलाई १०८ थान पुस्तक प्रदान गरेका थिए । राइनास नगरपालिका–६ स्थित शैलेपुत्री माध्यमिक विद्यालयलाई २५ थान पुस्तक सहयोग गरेका थिए ।
साथै आफ्नै जन्मदिनको अवसरमा उनले शारदा माध्यमिक विद्यालयलाई ३३ थान पुस्तक हस्तान्तरण गरेका थिए । न्यौपानेले पछिल्ला वर्षहरूमा विभिन्न विद्यालयलाई जम्मा २०६ थान पुस्तक वितरण गरेका छन् ।
न्यौपाने पछिल्ला वर्षमा बृक्षारोपण अभियान, विद्यार्थी प्रोत्साहन, र शैक्षिक सामग्री सहयोगमा निरन्तर सक्रिय छन्। बुबाको स्मृति दिवस र आफ्नै जन्मदिनलाई समुदायका लागि उपयोगी बनाउँदै उनले विद्यालय तथा विद्यार्थीहरूलाई सहयोग गर्ने परम्परा निरन्तरता दिँदै आएका छन्।
