आगामी असोज पाँच गतेदेखि नौ गतेसम्म गोरखा जिल्लाका एक हजार सात सय ६३ जना किशोरीलाई पाठेघरको क्यान्सरविरुद्धको खोप (एचपिभी) लगाइने भएको छ। राष्ट्रिय खोप कार्यक्रमअन्तर्गत जिल्लाका विभिन्न १६८ वटा विद्यालय तथा खोप केन्द्रमार्फत कक्षा छ मा अध्ययनरत एक हजार सात सय ५३ छात्राहरु र विद्यालय नजाने १० वर्षका १० जना किशोरी गरी कुल एक हजार सात सय ६३ जनालाई खोप दिन लागिएको हो।
गोरखा नगरपालिकामा सबैभन्दा धेरै चार सय ८७ जना कक्षा छ का छात्राहरुले खोप पाउनेछन्। पालुङटार नगरपालिकामा दुई सय ३३ छात्रा र एक जना विद्यालय नजाने किशोरी गरी दुई सय ३४ जनालाई खोप लगाउने लक्ष्य छ। बारपाक सुलिकोट गाउँपालिकामा एक सय ६२ छात्रा र छ जना विद्यालय नजाने किशोरी गरी एक सय ६८ जना खोप कार्यक्रममा समेटिनेछन्।
धार्चे गाउँपालिकामा एक सय ५१ छात्रा र दुई जना विद्यालय नजाने किशोरीसहित एक सय ५३ जना तथा शहिदलखन गाउँपालिकामा एक सय छात्रा र एक जना विद्यालय नजाने किशोरी गरी एक सय एक जना किशोरीलाई खोप दिइनेछ।
आरुघाट गाउँपालिकामा एक सय ३७, गण्डकी गाउँपालिकामा एक सय ३४, सिराञ्चोक गाउँपालिकामा एक सय ११, भिमसेनथापा गाउँपालिकामा एक सय दुई, अजिरकोट गाउँपालिकामा ९७ र चुमनुव्रि गाउँपालिकामा ३९ जना कक्षा छ का छात्राहरुलाई एचपिभी खोप लगाइनेछ।
जिल्लाभरका १६८ वटा खोप केन्द्रमार्फत सञ्चालन हुने यस अभियानका लागि तीन सय २६ जना स्वास्थ्यकर्मी र अन्य स्वयम्सेवक परिचालन गरिनेछ। आरुघाट गाउँपालिकामा असोज पाँच र छ गते खोप कार्यक्रम सञ्चालन हुनेछ भने पालुङटार नगरपालिकामा असोज पाँचदेखि आठ गतेसम्म सञ्चालन हुनेछ। अन्य नौ वटा स्थानीय तहमा भने असोज पाँचदेखि सात गतेसम्म खोप सेवा सञ्चालन हुनेछ।
जिल्ला स्वास्थ्य कार्यालयका नानी बाबु दानीले योजना तयार पारेको र डाक्टर सिमृन काफ्लेले सदर गरेको विवरणअनुसार खोप अभियानका लागि दुई हजार दुई सय भायल एचपिभी खोप र सोही संख्यामा सिरिन्ज प्रयोग गरिनेछ।
