गोरखाको लुईँटेलमा रहेको अमर ज्योती जनता माध्यामिक विद्यालयलाई कम्युटर सहयोग गरेको छ । पालुङटार नगरपालिका वडा नं ४ लुईँटेलमा रहेको उक्त
विद्यालयलाई आज इन्गेज नेपालले १० थान कम्युटर सहयोग गरिएको हो ।
विद्यालयका पूर्व विद्यार्थी एवम् युनिभर्सिटी अफ मिनिसोटा मोरिसका अर्थशास्त्रका सह–प्राध्यापक डा सतीशचन्द्र देवकोटाको सक्रियतामा नेपालका लागि अमेरिकाका पूर्व राजदूत स्टक एच डेलिसी सङ्लग्न संस्था इन्गेज नेपालबाट उक्त कम्युटर सहयोग गरिएको हो । कम्युटर विद्यालयका पूर्व विद्यार्थी एवम् भूगर्भविद् डा कृष्णचन्द्र
देवकोटा र पालुङटार नगरपालिकाका नगरप्रमुख ईञ्जिनीयर दिपकबाबु कडेँलले विद्यालयका व्यवस्थापन समितिका अध्यक्ष गङ्गा सुनार र प्राचार्य माधवराज देवकोटालाई संयुक्त रुपमा हस्तान्तरण गर्नुभयो ।
कार्यक्रममा नगरप्रमुख कँडेलले अमरज्योती जनता माविलाई नगरपालिकाको मात्र नभएर जिल्लाको नमूना विद्यालय बनाउनका लागि नगरपालिका कटिवद्ध भएर लागेको बताउनुभयो । “पालुङटार नगरपालिकालाई शिक्षाको हव निर्माणका लागि हामी लागिरहेका छौँ,”–
नगरप्रमुख कडेँलले भन्नुभयो ।
विद्यालयका पूर्व विद्यार्थी एवम् युनिभर्सिटी अफ मिनिसोटा मोरिसका अर्थशास्त्रका सह–प्राध्यापक डा सतीशचन्द्र देवकोटाले विद्यार्थीको क्षमता अभिवृद्धिका लागि कम्युटरले ठूलो सहयोग पुग्ने विश्वास व्यक्त गर्नुभयो
। इन्गेज नेपालका कोषाध्यक्ष खेमराज सेडाईँले राजधानीबाट टाढा रहेको सरकारी विद्यालयलाई अमेरिकामा बसेर सहयोग गर्न पाउँदा आफूहरुलाई साह्रै खुशी लागेको बताउनुभयो । इन्गेज नेपालले स्थापनाको ६ वर्षको अवधिमा रु ६ करोडभन्दा बढी आर्थिक सहयोग
गरिसकेको जानकारी दिनुभयो ।
कार्यक्रममा भूगर्भविद् डा देवकोटाले अहिलेका विद्यार्थीले
आफूलाई प्रविधिमा ढाल्नका लागि कम्युटरले सहयोग पुग्ने विश्वास व्यक्त गर्नुभयो । विद्यालयको इतिहासलाई आगामी दिनमा कायम राख्न विद्यार्थीलाई लाग्न उहाँले आग्रह समेत गर्नुभयो ।
पालुङटार नगरपालिका वडा नं ४ का कार्यवाहक वडा अध्यक्ष डिलेन्द्रबहादुर देवकोटा, विद्यालय व्यवस्थापन समितिका अध्यक्ष सुनार, विद्यालयका प्राचार्य देवकोटा लगायतले प्रविधिमैत्री विद्यालय निर्माणका लागि
कम्युटर सहयोगले विद्यालयलाई ठूलो राहत मिलेको बताउनुभयो । विद्यालयलाई ५० कम्युटरसहितको सुविधासम्पन्न ल्याव निर्माणमा लागेको
प्राचार्य देवकोटाको भनाई छ ।
स्व गोविन्दराज देवकोटाको सक्रियतामा स्व कृष्णप्रसाद धिताल संस्थापक अध्यक्ष रहेर विस २०१७ फागुन ९ मा स्थापना भएको उक्त विद्यालय सुरुवाती समयदेखि नै युनाइटेड मिसन टु नेपालको आर्थिक एवम् प्रशासनिक
सहयोगमा सञ्चालनमा रहेको थियो ।
राष्ट्रिय शिक्षा योजना विस २०२८ अनुसार विस २०३० सालदेखि उक्त विद्यालयलाई नेपाल सरकारले सरकारी विद्यालयका रुपमा जिम्मा लिएर सञ्चालन हुँदै आएको सो विद्यालयका पूर्व प्राचार्य गोविन्दप्रसाद खनालले जानकारी
दिनुभयो । उक्त विद्यालयले विस २०२२ सालदेखि एसएलसी परिक्षामा विद्यार्थीलाई सम्मिलित गराएको थियो । विस २०२६ सालमा पूर्व प्रधानमन्त्री डा बाबुराम भट्टराई सो विद्यालयबाट वोर्ड फस्ट भएपछि उक्त विद्यालयको शैक्षिक क्षेत्र चर्चाको शिखरमा पुगेको थियो । उक्त विद्यालय पालुङटार नगरपालिकाभित्रकै एकमात्र नमूना तथा आवासीय विद्यालय हो । यस विद्यालयमा विशेष शिक्षा अन्तर्गत लामो समयदेखि दृष्टिविहिनहरुलाई पनि पठनपाठन गराउँदै आएको छ । उक्त विद्यालयमा हाल ७५० विद्यार्थी अध्यापनरत रहेका छन् भने ३२ शिक्षक कार्यरत रहेको सो विद्यालयका शिक्षक सोमप्रसाद
मुडवरीले जानकारी दिनुभयो ।
उक्त विद्यालयले विस २०६६ सालदेखि उच्च मावितर्फ विज्ञान र व्यवस्थापन सङ्कायको पठनपाठन समेत सुरु गरिसकेको छ ।