विगत तीन वर्षदेखि वर्षेनी बादरले बालीनाली नोक्सान गर्न थालेपछि यहाँका १२६ किसानलाई मङ्की चेजिङ डिभाई वितरण गरेको छ । दोर्दी गाउँपालिकाले आज पालिकाभित्र रहेको उक्त संख्यामा प्रति किसानलाई एक ÷एक वटा मङ्की चेजिङ डिभाई वितरण गरेको हो ।
एक कार्यक्रमका बीच गाउँपालिका अध्यक्ष युवराज अधिकारी, उपाध्यक्ष विच्छबहादुर घले लगायतले संयूक्त रुपमा किसानलाई उक्त सामग्री हस्तान्तरण गरेको हो । गाउँपालिका अध्यक्ष अधिकारीले बादर धपाउने सामग्री हस्तान्तरण गर्नुहुँदै किसानले दुख गरेर लगाएको खेति बादरले नोक्सान बनाउँदा खेति गर्ने किसान मारमा पर्दै आएको र उक्त सामग्रीले धेरै राहत पुग्ने बताउनुभयो । पालिकाले किसानलाई प्राथमिकतामा राखेर काम गर्दै आएको र आगामी दिनमा समेत विभिन्न प्रकारको सहयोग रहने उहाँको भनाई छ ।
गाउँपालिकाको कृषि शाखाको आर्थिक वर्ष २०७८÷०७९ को कृषि विशेष अनुदान कार्यक्रम अन्तर्गत किसानलाई उक्त बादर धपाउने सामग्री वितरण गरिएको कृषि शाखा प्रमुख बेन्जु अधिकारीले बताउनुभयो । उहाँका अनुसार वडाको सिफारिसमा प्रत्येक वडाका १४÷१४ किसानलाई गाउँपालिकाको ८० प्रतिशत र किसानको २० प्रतिशत अनुदानमा डिभाईस वितरण गरिएको हो । प्रति डिभाईस २ हजार ७०० रुपैया बराबरको रहेको गाउँपालिका कृषि शाखाले जनाएको छ । कृषि प्राविधिक नरहरी पौडेलले अनुदानको उक्त सामग्री लिनआउने किसानहरुलाई डिभार्स फड्काउने विधि बारे जानकारी गराएको थियो । मेसिन पाएसँगै बाँदरबाट अन्नबाली जोगाउन सकिने भन्दै किसान हर्षित भएका थिए ।
