वैशाख १, नाल्मा । बेसीशहर नगरपालिका वडा नम्बर ५ नाल्मा स्थित सुनकोट डाँडामा निर्माण गरिएको लालीगुराँस पार्क र वनभोज स्थलको आज उदघाटन गरिएको छ। सुनकोटमा स्थानीयबासीको सहयोग र सकृयतामा निर्मित स्वागत द्वार, वनभोज स्थल, कार्यक्रम स्टेज र भान्छाघर जस्ता संरचनाको उदघाटन गरिएको हो ।
नयाँ वर्षको अवसरमा आयोजित एक समारोहका बीच नगरप्रमुख गुमानसिंह अर्यालले नवनिर्मित संरचनाको उदघाटन गर्नु भएको हो। उक्त समारोहमा बोल्दै नगरप्रमुख अर्यालले स्थानीय बासिन्दाको अगुवाइ, सकृयता र आर्थिक सहयोगमा उदाहरणीय कार्य भएको बताउँदै खुलेर प्रशंसा गर्नुभयो। नाल्माबाट विवाह गरेर गएका छोरीचेली र ज्वाईंचेलाले माईतीगाउँको विकासका लागि आर्थिक सहयोग जुटाएर बाटोघाटो बनाएको देखेर आफू भावुक बनेको बताउनु भयो। नाल्माबासीको काम प्रति आफु सुरु देखिनै सकरात्मक रहेको बताउनु भयो। प्रचुर संभावना बोकेको हुँदा निरन्तर गाउँको विकासमा लाग्न र जिल्लाकै नमुनागाउँ बनाउन आग्रह गर्नुभयो। आफुले कसैलाई ढाँटछल नगरी नगरपालिकाको बजेटले जति सकिन्छ त्यसले विस्तारै विकास निर्माणका काम गर्दै जाने बताउँदै नगरले नसक्ने योजनामा प्रदेश र संघीय सरकार समक्ष पहल गर्ने प्रतिवद्धता व्यक्त गर्नुभयो। सडक, शिक्षा, स्वास्थ्य, खानेपानी, सिंचाइ, कृषि, सामुदायिक भवन, पर्यटकीय संरचना आदिको विकासमा उचित योजना बनाएर माग गर्न समेत नगरप्रमुख अर्यालले स्थानीयबासीमा आग्रह गर्नुभयो।
त्यसैगरी, नगर उपप्रमुख पदमा गुरुङले आफ्नो ठाउँलाई नमुना गाउँ बनाउने नाल्माबासीको प्रयास लोभ लाग्दो रहेको बताउँदै प्रशंसा गर्नुभयो। साँस्कृतिक, प्राकृतिक, पर्यटकीय र पर्यावरणीय दृष्टिकोणले निकै राम्रो संभावना रहेकोले जिल्लाकै उत्कृष्ट गन्तव्य बनाउन सकिने बताउँदै सम्बन्धित निकायमा पहल गर्न पनि उहाँले आग्रह गर्नुभयो। नगरपालिका बाट विनियोजित बजेटको शतप्रतिशत उपयोग भएको पाईएकाले उचित योजना बनाएर नगर, प्रदेश र संघीय सरकार सँग बजेट माग गर्न समेत उपप्रमुख गुरुङले आग्रह गर्नुभयो।
कार्यक्रममा नेकपा एमालेका कार्यालय सचिव विवश बुढाथोकी, निवर्तमान वडाध्यक्ष बमबहादुर गुरुङ, नेपाली काँग्रेसका वडासभापति तकबहादुर गुरुङ, नाल्मा समाज काठमाडौंका अध्यक्ष अमृत गुरुङ, बाबासमुहका अध्यक्ष जङ्गबहादुर गुरुङ, पूर्वशिक्षक दिलमान गुरुङ, समाजसेवी लक्ष्मण गुरुङ, न्यु शिवशक्ति युवा क्लबका अध्यक्ष महादेव गुरुङ लगायतले शुभकामना एवम् आफ्नो धारणा व्यक्त गर्नुभयो ।
वडाध्यक्ष ईन्द्रबहादुर गुरुङको अध्यक्षता, नगरप्रमुख गुमानसिंह अर्यालको प्रमुख आतिथ्य एवं उपप्रमुख पदमा गुरुङको विशेष आतिथ्यमा भएको कार्यक्रममा नगरप्रमुखका प्रेस सल्लाहकार कृष्ण केसी, रेडियो चौतारीका अध्यक्ष किसान संगीत नेपाली, ईन्सेक प्रतिनिधि प्रमोद अधिकारी, वडा सचिव पूर्णबहादुर भोलान, लाङ्दी हरियाली सामुदायिक वन उपभोक्ता समितिका अध्यक्ष डम्बर गुरुङ लगायतले पनि नयाँवर्षको अवसरमा शुभकामना आदानप्रदान गर्नुभयो।
गाउँमा पर्यटकीय संरचनाको विकास गर्दै आन्तरिक तथा वाह्य पर्यटक भित्र्याएर पर्यटन मार्फत् आर्थिक सम्वृद्धि हासिल गर्ने लक्ष्य लिईएको वडाध्यक्ष ईन्द्रबहादुर गुरुङले बताउनु भयो। वरिपरि लालीगुराँसको सुन्दर जंगल रहेको, प्राकृतिक दृश्यावलोकन गर्न सकिने र होमस्टे सञ्चालनको पनि संभावना रहेको उहाँले बताउनु भयो। सुनकोटमा सदियौं पुरानो तीनकन्या देवी मन्दिर रहेको र अहिले दृश्यावलोकन टावर निर्माण भईरहेको उहाँले जानकारी गराउनु भयो। सो अवसरमा जमबहादुर गुरुङले कार्यक्रम सञ्चालन गर्नुभयो ।
