दोर्दी गाउँपालिका अध्यक्ष युवराज अधिकारीले कृषि क्षेत्रमा गाउँपालिकाले आगामी दिनमा अझै बजेट बढाउने बताउनु भएको छ । पालिकाको वडा नं. ३ श्रीमञ्जाङस्थित उत्तरपानीदेवी कृषि सहकारी संस्थाको १५ औँ साधरणसभालाई शनिबार सम्बोधन गर्नुहुँदै उहाँले यस्तो बताउनु भएको हो ।
कृषि सम्बन्धि निति नबनिसकेको र यसको निति निर्माण भएपछि अझै कृषि सम्बन्धि विभिन्न कार्यक्रम ल्याउँदै लगानी समेत बढाउने योजनामा रहेको उहाँको भनाई छ । यस्ता सहकारीहरुले स्थानीय एवं कृषकहरुलाई सहज बनाएकाले सहकारीहरु बढी मुनाफा भन्दा सेवामुलक बन्नुपर्नेमा उहाँले जोड दिनुभयो । त्यस्तै, उहाँले भन्नुभयो पालिकामा कृषिसँगसँगै पर्यटनलाई पनि जोड्न सके समृद्धि पालिका बन्नेछ । पालिकाले कृषि, पर्यटन, शिक्षा, स्वास्थ्य र भौतिक पूर्वाधार एवं रोजगारलाई पहिलो प्राथमकितामा राखेर अघि बढिरहेको उहाँले बतानुभयो । सो कार्यक्रममा गाउँपालिका उपाध्यक्ष विच्छबहादुर घले, निवर्तमान गाउँपालिका अध्यक्ष ओमबहादुर गुरुङ लगायतले मन्तव्य राख्दै सहकारीले कृषकको जीवन उकास्न मदत पुग्ने बताएका थिए ।
त्यस्तै, सो कार्यक्रमको अवसरमा दुई उत्कृष्ट कृषकलाई पुरस्कृत गरेको थियो । सहकारीका सदस्य रहेर कृषि क्षेत्रमा उत्कृष्ट गरेका राज्यप्रसाद घिमिरे र सोमनाथ घिमिरेलाई जनही पाँच सय रुपैयाँ सहित सम्मान गरिएको सहकारीका अध्यक्ष रामकान्त वाग्लेले बताउनुभयो । हामीले प्रत्येक वर्ष दुई दुई जना उत्कृष्ट कृषकहरुलाई पुरस्कृ तिगर्दै आएको र यस वर्ष पनि राज्यप्रसादको तरकारी खेति र बाख्रापान र सोमनाथको बाख्रापानमा राम्रो भएकाले उनीहरुलाई उत्कृष्ट कृषक घोषणा गरेका हौँ ।
सुरुमा २५ जनाबाट अघि बढेको यस सहरकारीमा हाल २५२ जना सेयर सदस्य रहेको सहकारीले जनाएको छ । त्यस्तै, एक वर्षको अवधिमा ८० लाख रुपैयाँ हाराहारीमा कारोबार गर्दा १ लाख ५७ हजार रुपैयाँ मुनाफा भएको सहकारीका अध्यक्ष वाग्लेले बताउनुभयो ।