नेपाल कम्युनिष्ट पार्टी (एमाले) लमजुङ जिल्ला कमिटी लमजुङको ८ औं जिल्ला अधिवेशनको बन्दसत्र सुरु भएको छ ।
शनिबार विहानबाट जिल्ला समन्वय समिति लमजुङको सभाहलमा बन्दसत्र सुरु भएको नेकपा एमाले जिल्ला संगठन कमिटीले जनाएको छ । कमिटीका अध्यक्ष कृष्णप्रसाद अधिकारीका अनुसार लमजुङको ८ वटै स्थानीय तहको ७५ वटै वडाबाट प्रतिनिधि सहभागि भएका छन् । शुक्रबार सुन्दरबजारमा उद्घाटन सत्र सकिएपछि शनिबारदेखि बेंसीसहरमा बन्दसत्र सुरु भएको हो ।
बन्दसत्रमा ६ सय ५१ जना प्रतिनिधि सहभागि भएका छन् । नेकपा एमालेको यसअघि वडा तथा पालिका अधिवेशन भइसकेका छन् । पार्टीको केन्द्रीय १० औं महाधिवेशन पनि भइसकेको छ । गण्डकी प्रदेशको मनाङ र मुस्ताङबाहेक नेकपा एमालेको सवै जिल्लामा अधिवेशन भइरहेको छ । नेकपा एमाले लमजुङको बन्दसत्रलाई केन्द्रीय उपमहासचिव पृथ्वीसुब्बा गुरुङले विशेष सम्बोधन गर्ने कार्यक्रम छ । यो अधिवेशनबाट विभिन्न प्रतिवेदनहरु पारित गर्दै नयाँ नेतृत्व चयन गर्नेछ ।