काठमाडौँ– प्रधानमन्त्री केपी शर्मा ओलीले चालेको संसद विघटनको कदमविरुद्ध नेपाल बन्दसम्मका आन्दोलनका कार्यक्रम दलहरूले अघि सारेका छन् । बन्द हड्तालका कार्यक्रमलाई निरुत्साहित गर्नुपर्ने बताउँदै आएका दलहरुबाट नेपाल बन्द गर्नेसम्मको चेतावनी आउनुले देश फेरि आन्दोलनको भूमरीमा फस्ने आंकलन गरिएको छ । यसै क्रममा प्रधानमन्त्री केपी शर्मा ओलीले चालेको कदम बिरुद्ध नेपाल कम्युनिष्ट पार्टी नेकपाका अर्का अध्ययक्ष पुष्पकमल दाहाल (प्रचण्ड)ले आफू पक्षीय केन्द्रीय समिति बैठकलाई सम्बोधन गर्दै बिहिवार कडा आन्दोलनमा जाने उद्घोष गरे ।
पुष ५ गते प्रधानमन्त्री ओलीको सिफारिसमा राष्ट्रपति विद्यादेवी भण्डारीले संसद विघटन गरेसँगै प्रदर्शन र आन्दोलनको लहर चलेको हो । विभिन्न दलका भातृ संगठनहरुले देशका विभिन्न ठाउँमा अहिले पनि विरोध प्रदर्शनहरु गरिरहेका छन् ।
प्रचण्ड नेपाल पक्षीय नेकपाको बैठकले आन्दोलनका विभिन्न कार्यक्रमहरु समेत घोषणा गरेको छ । आन्दोलनको तयारीका लागि नेकपाका प्रवक्ता नारायणकाजी श्रेष्ठको नेतृत्वमा दुइ हजार ५ सय १ सदस्यीय सघर्ष समिति गठन गर्ने तयारी भएको छ । प्रवक्ता श्रेष्ठका अनुसार पुस १४ गते देशव्यापी विरोध प्रदर्शन गर्ने निर्णय बैठकले गरेको छ ।
उता प्रमुख प्रतिपक्षी दल नेपाली कांग्रेसले पनि देशव्यापी आन्दोलनको घोषणा गरेको छ । कांग्रेस केन्द्रीय कार्यसमितिको बिहीबार बसेको बैठकले प्रतिनिधि सभा विघटन गर्ने प्रधानमन्त्री ओलीको कदम विरुद्ध पुष १३ गते देशका १ सय ६५ निर्वाचन क्षेत्रमा एकसाथ विरोध प्रदर्शन गर्ने निर्णय गरेको हो । कांग्रेस प्रवक्ता विश्वप्रकाश शर्माले सभापति शेरबहादुर देउवाको प्रस्तावमा बैठकले सर्वसम्मत निर्णय गरेको बताए ।
कांग्रेसले प्रधानन्त्री ओलीको यो कदम असंवैधानिक र अलोकतान्त्रिक भएको निष्कर्ष सहित विरोध प्रदर्शन गर्ने निर्णय गरेको हो । यस्तै पार्टीमा कोही आन्दोलनको पक्षमा र कोही निर्वाचनको पक्षमा भन्ने खालको विवरणहरु विभिन्न सञ्चार माध्यममा आएको र त्यसमा सत्यता नरहेको पनि प्रवक्ता शर्माले बताएका छन् ।
पुष ५ गते संसद विघटनपछि बसेको नेपाली कांग्रेसको पदाधिकारी बैठक र नेपाली कांग्रैसकै संयोजनमा बसेको सर्वदलीय बैठकले संसद विघटनको कदमलाई असंवैधानिक ठहर गरेको थियो । कांग्रेसले सबै लोकतन्त्रवादी, संविधानको पक्षधर, निरंकुशता र सर्वसत्तावादका बिरोधी सबैलाई संविधानको रक्षा गर्न एकताबद्ध हुन पनि आग्रह गरेको छ ।
यस्तै जनता समाजवादी पार्टी, नेपाल (जसपा)ले संसद विघटनको विरुद्धमा घोषणा गरेको आन्दोलनको तयारी शुरु गरेको छ । जनता समाजवादी पार्टी, नेपाल केन्द्रीय कार्यकारिणी समितिको मंगलबार बसेको बैठकले संसद विघटनको विरोधमा आन्दोलनका कार्यक्रम तय गरेको थियो । सोही आन्दोलनका कार्यक्रमलाई सफल बनाउन रणनीति तयार गर्न बिहीबार बैठक बसेको जसपाका नेता केशव झाले बताए ।
जसपाले यस अघि नै केन्द्रीय कार्यकारिणी समितिको बैठकबाट पुष १० गते प्रधानमन्त्री र राष्ट्रपतिको पुत्ला दहन गर्ने, पुष ११ गते मशाल जुलुस निकाल्ने र पुष १२ गते बृहत प्रदर्शन गर्ने कार्यक्रम तय गरिसकेको छ ।
