काठमाडौँ, ४ भदौ । नेपाली काँग्रेसका युवा नेता एवम् गण्डकी प्रदेशका सांसद प्रकाशचन्द्र दवाडीले युरिया मलको अभावमा रहेका जनतामाथि सरकारले भ्रमको खेती गरेको बताउनुभएको छ ।
सांसद दवाडीले आज एक विज्ञप्ती जारी गरी धान रोपाईँ सकिएको लामो समय वितिसक्दा पनि सरकारले कृषकलाई युरिया मल आयात गरी उपलब्ध गराउन नसक्नु दुःखद कुरा भएको बताउनुभएको हो ।
उहाँले पूर्व तयारी गरी कृषकलाई समयमै मल उपलब्ध गराउनुपर्नेमा सयम गुज्रिसक्दा पनि मल उपलब्ध गराउन नसक्नु वर्तमान सरकार कृषकप्रति उदासीन रहेको प्रष्ट देखिएको बताउनुभयो ।
“आज मलाई चिन्ता लागेको छ सरकारले सोझा जनतालाई विगतको बेलाजस्तै आश्वासन देखाएर जनतामाथि भ्रमको खेती त गरिरहेको छैन ?,”– उहाँले प्रश्न गर्नुभयो ।
सांसद दवाडीले गरिब किसानले दुःख कष्टका साथ लगाएको धानवाली पहेँलिने अवस्थामा समयमै मल नहाल्दा बाली विग्रने, धान उत्पादनमा ह्रास आउने जसका कारण भविश्यमा भोकमरी हुने अवस्था आउने उल्लेख गर्नुभयो । कोरोना महामारीसँगै मलको अभाव हुँदा कृषकको बाली नष्ट हुने, श्रम खेर जाने, खाद्यान्नको अभाव हुने उहाँको भनाई छ ।
उहाँले कोभिड–१९ का सामाग्री ल्याउँदाजस्तो मल आयातमा पनि अनियमितता हुने त होइन भन्दै सरकारलाई प्रश्न गर्नुभयो । सरकारलाई कृषकको पीडावोध गरी तत्काल निकाशको बाटो खोजेर चाँडो मल आयात गरी सहुलियतदरमा मल उपलब्ध गराउन आग्रह सांसद दवाडीले आग्रह गर्नुभएको छ ।
गोरखा क्षेत्र नं २ प्रदेश (ख) बाट निर्वाचित सांसद दवाडीले मल आयातमा भइरहेको ढिलाई तथा अनियमितताको सत्यतथ्य छानविन गरी दोषीलाई कारबाही गर्नसमेत माग गर्नुभएको छ ।
विज्ञप्तीमार्फत उहाँले हरितालिका तीज–२०७७ को पावन अवसरमा स्वदेश तथा विदेशमा रहनुभएका सम्पूर्ण नेपाली नारीहरुलाई हार्दिक शुभकामना व्यक्त गर्नुभएको छ ।
सांसद दवाडीले अहिले देश कोभिड–१९ को महामारीसँगै ज्यादै अफ्ठयारो परिस्थितीमा रहेको भन्दै सुरक्षित भएर घरभित्र तीज मनाउन सबैलाई आग्रह समेत गर्नुभएको छ ।