गोरखा — नेवाः समुदायको सांस्कृतिक तथा सामाजिक संस्था नेवाः देय् दबू, पालुङटार नगर समितिको तेस्रो वार्षिक साधारण सभा तथा अधिवेशनबाट बसन्त कुमार श्रेष्ठ अध्यक्षमा चयन भएका छन्।
शुक्रवार (चैत्र २७ गते) पालुङटार नगरपालिका–५ ठाँटीपोखरीस्थित नेवाः देय् दबू भवनमा सम्पन्न सभाले श्रेष्ठको नेतृत्वमा १३ सदस्यीय नयाँ कार्यसमिति सर्वसम्मत रूपमा चयन गरेको हो।
नवगठित समितिको उपाध्यक्षमा जीवन कुमार श्रेष्ठ, सचिवमा भरतबाबु श्रेष्ठ, सहसचिवमा सरिता श्रेष्ठ तथा कोषाध्यक्षमा ससिकला श्रेष्ठ चयन भएका छन्। अन्य सदस्यहरू पनि समेट्दै समितिलाई पूर्णता दिइएको छ।
कार्यक्रममा बोल्दै नवनिर्वाचित अध्यक्ष बसन्त कुमार श्रेष्ठले नेवाः समुदायको भाषा, संस्कृति र परम्पराको संरक्षण तथा प्रवर्द्धनमा समिति सक्रिय रूपमा लाग्ने प्रतिबद्धता व्यक्त गरे। उनले समुदायलाई एकताबद्ध बनाउँदै विविध सांस्कृतिक कार्यक्रमहरू सञ्चालन गर्ने योजना रहेको जानकारी दिए।
यसैगरी, भेलाले ९ सदस्यीय सल्लाहकार समिति समेत गठन गरेको छ। सल्लाहकार समितिमा जुनलाल श्रेष्ठ, कृष्णबहादुर श्रेष्ठ, गणेशलाल श्रेष्ठ, बाबुराम श्रेष्ठ, निर्मला मल्ल, हरिकुमार श्रेष्ठ, कृष्ण जी श्रेष्ठ, हितकाजी श्रेष्ठ र राम कुमार श्रेष्ठ चयन भएका छन्।
कार्यक्रममा स्थानीय नेवाः समुदायका अगुवाहरूको उल्लेख्य उपस्थिति रहेको थियो। सभाले आगामी दिनमा संस्थालाई अझ सशक्त बनाउँदै समुदायको हितमा विविध गतिविधि सञ्चालन गर्ने निर्णय समेत गरेको छ।
