पलुङटार , असार १७ गते। गोरखाको पालुङटार नगरपालिका–२ अन्तर्गत पर्ने पुतलीखेत–लिगलिग सडक खण्ड निर्माण सम्पन्नको म्याद सकिनु अगाबै कालोपत्रे गरिएको छ। करिब ३.५ किलोमिटर सडक कालोपत्रे भएपछि स्थानीयवासी तथा लिगलिगकोट भ्रमणमा आउने पर्यटकलाई सहज र सुरक्षित यात्रा गर्न मद्दत पुगेको छ।
पुतलीखेतबाट लिगलिगकोटसम्मको दूरी करिब १० किलोमिटर रहेको छ। बाटो सुरु हुने पुतलीखेतदेखि तातोपानी (खारपानी) सम्मको दूरी झण्डै १.८ किलोमिटर छ। प्राकृतिक रूपमा निकै प्रख्यात रहेको तातोपानीमा स्नान गर्दा विविध किसिमका रोगहरू निको हुने जनविश्वास रहेको छ।
पालुङटार नगरपालिकाको विशेष पहलमा भौतिक पूर्वाधार कार्यालय गोरखाको ९ करोड ८७ लाख २७ हजार ८३६ रुपैयाँ बजेटमा सडक कालोपत्रे गरिएको हो। यस योजनाको निर्माण कार्य नेसनल भुमेश्वर शिव जेभीमार्फत २०८१ साल जेठ ७ गते सम्झौता भई सुरु गरिएको शिव निर्माण सेवाका प्रोपाईटर सबिन बस्नेतले बताउनु भयो । दक्ष प्राविधिक टोलीको सहकार्यमा कामलाई निरन्तरता दिँदा तोकिएको म्यादभन्दा एक वर्ष अघि नै सडक सम्पन्न गरिएको पनि बस्नेतले बताउनु भयो ।
सडक कालोपत्रे भएपछि पालुङटार–१ मा रहेको तातोपानीमा पनि आन्तरिक तथा बाह्य पर्यटकको आगमन बढ्ने विश्वास स्थानीयवासीहरूले व्यक्त गरेका छन्। यसले पालुङटार क्षेत्रमा पर्यटन प्रवर्द्धन तथा स्थानीय आर्थिक गतिविधिमा समेत सकारात्मक प्रभाव पार्ने अपेक्षा गरिएको छ।
लिगलिगकोट करिब १,४३७ मिटर (४,७१८ फिट) उचाइमा अवस्थित छ। यहाँबाट मनास्लु हिमालसहित गोरखा र लमजुङका धेरै भूभागहरू देख्न सकिन्छ। ऐतिहासिक, सांस्कृतिक र प्राकृतिक दृष्टिले महत्वपूर्ण लिगलिगकोट अहिले पदयात्रा, दृश्यावलोकन र ऐतिहासिक अध्ययनका लागि पर्यटकको आकर्षणको केन्द्र बन्दै गएको छ।
सडक स्तरोन्नति र पहुँच विस्तारले पालुङटार क्षेत्रको पर्यटन विकास मात्र होइन, सामाजिक–आर्थिक समृद्धिमा समेत ठूलो योगदान पुर्याउने विश्वास गरिएको छ।
